紀念館寄付文學家賴和濟項文物 予臺文館保存
郭柏均 莊浚佑 /臺北報導
發布時間：
更新時間：
目次
咱台灣佇日本時代的文學家賴和，是作家也是醫師、也是社會運動者。5月28是他的生日忌，賴和紀念館把共賴和的文物捐予臺灣文學館，希望這寡文物會當有閣較好的保存和應用。（這條新聞標題、前言是臺語文。）
文化部長史哲、對賴和紀念館代表的手中，接下賴和作品《豐作》的手稿。將來濟濟賴和的文物，攏會由國立台灣文學館收藏，賴和紀念館方面、會展出複製品。
賴和紀念館暨賴和基金會創辦人 賴悅顏表示：「上主要的部份是賴和的手稿，手稿是包括伊遐的小說、漢詩，抑是其他的新詩，所有的手稿攏捐予臺灣文學館來做保管。」
國立臺灣文學館長 林巾力表示：「紲落來咱會當活化遮的文物，咱予這寡文物，不只是囥佇博物館內，阮希望伊會使進一步活用 運用，通予社會大眾看著。」
賴和紀念館表示，因為民間紀念館的資源無夠，濟濟賴和的文物、無法度妥當收藏，所致決定共文物交予中央，安排更加好的保存環境。
賴和紀念館暨賴和基金會創辦人 賴悅顏表示：「彰化三年前有一擺大雨，恆濕恆溫(的設備)煞發生水有倒流，就共一寡手稿小可有汙損著，文學館來了解以後提去修復，修復了有影誠好勢。」
賴和紀念館表示，雖然紀念館未來干焦複製品通展出，有淡薄仔可惜；但是經過賴和基金會董事會決議，猶是決定捐予中央。相信對長久保存賴和的文物來講，會是較好的處理方式。
呂尚儒/編輯
