清華大學舉辦"黃春明週" 培養學生文學底蒂

今年88歲的黃春明老師，是台灣真出名的鄉土文學作家，其中上出名的作品有《兒子的大玩偶》、《看海的日子》遮的小說。黃春明老師的作品捌用演講、詩歌、研討會、戲劇遮的方式呈現。這改清華大學特別用老師過去的短篇小說〈借一个火〉做主題，舉辦「黃春明週」展現老師對土地的關懷。

清華大學校長 高為元：「講故事的這款能力是誠重要，阮希望佇講故事的過程中，會當激發人佮人之間的感情，以及無仝款領域合作的情懷。」

黃春明老師表示，這馬是電腦時代，逐家愈來愈少閱讀，造成文學素養愈來愈低，他希望會當透過活動，培養學生有更加實腹的文學素養。

臺灣鄉土文學作家 黃春明：「因為3C產品愈來愈濟、逐家閱讀習慣愈來愈少，而且寫文章的人寫完就直接貼去網路頂懸，雖然講嘛是有人去讀，毋過就是就狹細的，無公開予逐家客觀去肯定價值。」

黃春明老師是台灣鄉土作家、嘛是兒童劇團的創辦人，他嘛是一个插畫家，所以現場嘛展出老師親手畫的龜、露螺、遮的尪仔圖作品，予逐家看著多元的文化人，對土地的關懷。