「藥魔鬼怪退散」 竹縣府佇宮廟頭前辦反毒展覽

共毒品轉變成妖魔鬼怪的圖樣，予逐家了解毒品對健康的危害，閣透過香港真出名的拍小人遊戲，增加民眾對毒品害人的印象，這个特別的展覽、是佇新竹、竹北的伍福宮頭前的廟埕。

民眾：「共毒品變成妖魔鬼怪是真特別，而且嘛較接近民眾。」

廟方人員 官俊良：「阮念經念佛嘛是咧驅魔，予妖魔鬼怪離開，共毒品當做妖魔鬼怪、遠離家己。」

新竹縣毒品危害防制中心參自然科學博物館合作，以「藥魔鬼怪」做主題，用bàng-gah的方式，希望予少年家會當了解，毒品是千萬毋通磕。

新竹縣毒品危害防制中心科長 陳惠雯：「針對無仝的宮廟，有無仝的主題來做反毒品推廣活動。」

國立自然科學博物館副研究員 楊中信：「共毒品轉變做各種無仝款的鬼，來紹介鬼(毒品)對人的危害，予民眾了解按怎避免。另外嘛結合宗教信仰，用閻羅王佮地獄的概念來苦勸逐家毋通製毒賣毒。」

現場閣有展出十八層地獄以及閻羅王的圖，共逐家講毒品恐怖的所在，宮廟結合反毒，希望予民眾知影遠離毒品、才會保平安。