由鄭南榕基金會主辦的全國巡迴展覽， 29下晡去嘉義獨立冊店舉辦，現場除了有誠濟彼當陣的歷史資料以外，閣有伊的日記、伊寫的批。主辦單位講，希望用藝術的角度，予逐家閣較完整來了解鄭南榕。(此新聞標題、前言為臺文)
講故事的老師，透過繪本的故事，向大人佮囡仔來講自由的重要，邊仔閣有予民眾體驗貼印的活動，"自由紋理 探索在地Nylon足跡"的展覽，29下晡佇嘉義市的台灣圖書室來開幕。
民眾 周小姐：「因為我感覺佇囡仔ﰀ這个世代，認捌權威佮自由，這件代誌誠重要。」
楊同學：「透過了解過去，爭取言論自由的歷史，來了解現此時的，自由佮民主，是真無簡單才得著的，實在足珍貴。」
鄭南榕基金會表示，這改的展覽當中，有鄭南榕無仝時期的性命故事，透過伊留落來的日誌佮批，希望佇爭取自由的背後，予人知影伊佇無仝的身份之下，有啥物款的心情。
台灣圖書室理事長 林詩涵：「鄭南榕有一句話講，紲落來就是恁的代誌，（台灣圖書室)張宏榮醫生，嘛講過類似的話，就是少年人的時代到矣，我感覺這兩句話攏咧提醒，阮現代少年一輩，阮需要共遮民主佮自由的思想，傳達予咱的後一代。」
雲林古坑鄉長 林慧如：「對歷史充分了解，才有法度決定咱未來，欲按怎行國家的方向。」
鄭南榕基金會董事長 鄭竹梅：「佇遐的主張前進，伊嘛是一般人，伊嘛是某一个人的翁婿，某一个人的老爸，或者是某一寡人的兄弟，伊是按怎成做後來的模，
我是誠希望透過這个機會，會當予閣較濟人，來了解這个過程。」
這擺的展覽，對4月29展覽到5月28，鄭南榕基金會，希望會當用藝術佮展覽的方式，予來看的人，了解先輩爭取言論自由的過程，嘛予當代對民主有深刻的認捌。