上強春雨添6千外萬噸水 主要落佇雲林以北

拜六早時佇台北市的大佳河濱公園，無落雨，天氣烏陰烏陰。氣象局表示，禮拜日到拜二因為透東北風佮東風，食風面的北部、東北部可能會落雨；南部是以西北雨為主。

中央氣象局預報員葉致均表示：「明仔載到拜二的天氣，水氣攏較少，北部佮東半部的雨，攏是小可仔雨，估計雨勢攏袂傷大，中南部濟雲天氣為主，下晡山區、佮倚山區的平地，可能猶是有局部短暫陣雨出現。」

雖然因為20的鋒面，台灣各地攏有雨水，但是南部的洘旱、猶是無變好。22中晝，曾文水庫的水量只有7%左右、南化水庫26%左右、蘭潭水庫大概25%，仁義潭水庫22%左右。水利署表示，這个鋒面為全台水庫增加6017萬噸的水，但是主要攏集中佇中部以北。

經濟部水利署發言人王藝峰表示：「仁義潭佮蘭潭水庫加起來，只有入來30萬噸，曾文水庫加上烏山頭水庫，大概只有入來100萬噸、非常有限。以曾文佮烏山頭來講，蓄水率並這擺落雨進前，閣減少0.2%，雖然有一寡入水量，但是用水量猶是有。」

南部主要的水庫、水量無變濟，顛倒閣變少。氣象局估計，25佮30、攏有鋒面會到位，毋過通過的速度真緊，雨水袂有20的鋒面遐爾濟；南部的洘旱，可能愛等到5月中以後的黃酸雨、才有才調改善。