北港義民廟超過200年 廟方招民眾賞燈.看文物

莊嚴的廟寺、石雕的塚仔埔，遮是雲林北港的義民廟。北港義民廟，是因為清朝時發生抗官民變事件，包括林爽文事件佮戴潮春事件。這陣義士，為著保衛國土，犧牲家己的性命，北港為著欲紀念遮的義士，就起一間義民廟，到今拜超過2百年，也是雲林縣內重要的縣定古蹟。

北港義民廟主委蔡信捧講:「北港義民廟的義民是西元1788年，乾隆53年的時為國犧牲的，伊的神主牌仔佮伊的骨骸嘛會葬佇遮，後壁遮是108位，邊仔這兩墓是咱戴潮春事變的骨骸攏佇遮。」

毋但義民廟是縣定古蹟，內底收藏的五件文物，包含青花瓷仔、漳州窯、義民爺公的牌位等等，攏是雲林縣政府認定的古物，每一件攏有歷史故事佮文化意義。縣府表示，未來按算設一間展示廳、出版專冊，紀錄義民精神。

北港義民廟主委蔡信捧講:「青花瓷、漳州窯，佮戴潮春事件36位義士的神主牌仔，內面有一尊義民爺公的神尊，以後咱義民廟會起一間展示廳，展示予逐家看。」

廟方表示，今年的北港花燈，主燈就設佇咧義民廟門口，展到3/12，鼓勵民眾來北港時，會當去義民廟，做伙賞花燈、看文物，感受北港的人文佮歷史。