嘉義樹木園翻日本宿舍 臺日交流植物染展覽

對日本來的染布藝術家，向民眾來紹介植物染的過程佮功夫，嘉義林試所中埔研究中心佇嘉義樹木園，14舉辦台日交流的植物染工作坊，欲予民眾認捌植物的運用佮日本的工藝。

民眾蔡女士講:「植物染看了感覺誠媠，然後就是，天然的無汙染，誠健康閣佮環保。」農委會林試所副研究員范素瑋講:「阮這擺因為誠難得，會當邀請著日本的植物染織的創作家，所以就感覺這種宿舍佮染織的結合，是非常趣味的一種感覺。」

日本時代設立的嘉義樹木園，內底樹仔的種類多元，是學術研究佮民眾休閒的所在，為欲增加園區空間的活化，林試所整修園區內底的日本時代留落來的宿舍，頭一場展覽，就來紹介植物染的歷史。

日本台灣交流協會高雄事務所長小野一彥講:「透過這改植物染的展覽，希望閣較濟嘉義佮臺灣的民眾，會當感受著日本傳統的文化。」中埔研究中心助理研究員蔡景株講:「民國33年起好，後來因為誠長時間無人蹛，佇109年開始來整修，厝的格局是照原來去修理，無去共改過，所以咱看著就是上原始的日式建築。」

林試所中埔研究中心表示，修理好勢的宿舍會用來做服務中心佮展覽空間，紲落會閣繼續整修一寡宿舍，活化園區的空間，提升樹木園休閒佮教育的功能。