2/20起室內免掛喙罨 大眾運輸.醫療單位猶愛掛

來來去去的人潮，無論佇室外抑是室內，逐家喙罨猶是掛牢牢，到這馬秋冬專案室內掛喙罨的規定已經實施超過800工，舊年底指揮中心放冗室外喙罨規定，這禮拜台灣疫情穩定下降，指揮中心初九宣佈，若是疫情繼續穩定，對2月20開始，欲進一步放冗室內掛喙罨的規定。

中央流行疫情指揮中心指揮官王必勝表示：「已經相連紲五工比頂禮拜較降，而且下降趨勢真明顯，因為疫情會使控制，咱也愛沓沓恢復正常生活，這个政策方向之下，咱就宣佈第二階段的喙罨放冗措施。」

第二階段通案喙罨放冗措施分做三个部份，醫療機構、長照機構、公共運輸場所等等指定場所，猶是強制掛喙罨；人濟的所在、有年歲的序大、有症狀、免疫力較低的人，建議愛掛喙罨；其他的場所，予民眾自主決定，學校的部份對3月初6開始。

教育部主任秘書廖興國表示：「各級學校開學進前，經過年假閣有歇寒，開學了後閣拄著，228和平紀念日的四工連假學生老師可能會出入人濟的觀光地區兩到三禮拜，予學校觀察期佮準備期。」

中央流行疫情指揮中心指揮官王必勝表示：「放冗措施是通案規定，相關實施的細節，會使由主管機關來規定辦理。」

指揮中心表示，推算目前台灣自然感染率已經達到60%、注三筒疫苗的人口達到76%，加上變種病毒對中重症數量影響有限等等原因，才規劃放冗。抑若第三階段全面放冗喙罨的規劃，會看第二階段實施的狀況才閣決定。