九合一大選賰12工，各種民調也攏公開。根據自由時報的上新民調，臺北市長選戰三跤㧣，民進黨陳時中的支持度上懸。對這份民調，陳時中佮蔣萬安攏講，市政才是上重要的，會繼續拚支持度；無黨籍黃珊珊煞認為，大部份的民調攏袂使相信。
九合一大選賰12工，各單位選前上後一波會當公佈的民調連紲出爐，結果台北市長選戰三跤ﰰ領先的人煞無相siāng，根據自由時報做出來的結果，以民進黨陳時中的支持度上懸34.8%、國民黨蔣萬安28.71%、無黨籍黃珊珊23.45%；若講著看好啥人當選，是蔣萬安排第一、紲落來是陳時中、黃珊珊排第三。對此蔣萬安表示，民調做參考就好。進前蔣萬安真濟擺強調，欲以美國矽谷律師的經驗來改變台北，毋過這陣煞予人煏講，伊服務的公司真濟是替中國企業做代誌。
國民黨台北市長候選人蔣萬安表示，「過去這个事務所，有接全世界各企業，佇美國的法律業務，攏完全符合美國當地的法律規定。其實美國政府、美國人攏無煩惱，民進黨煩惱啥？」
民進黨陳時中針對民調表示，支持度會使排第一誠歡喜，強調猶是會繼續拍拚。毋過伊也質疑蔣萬安的矽谷律師經驗。
民進黨台北市長候選人陳時中表示，「是無毋著，伊有矽谷律師的經驗，毋過我欲問的，咱愛問講，遐的經驗有佗一寡仔，會當提出來佇做台北市長的時參考佮學習。」
無黨籍台北市長候選人黃珊珊講，「我一直毋知伊的矽谷經驗是啥，因為矽谷有真嚴重的懸厝價問題，閣有資本金錢遊戲的問題，做律師干焦會使個案了解，但是對城市的發展，可能愛全面通盤對地方的熟似。」
針對民調黃珊珊認為，民調有真濟操作空間，而且各民調的結果差別真大，顯示大部份民調攏袂使相信。伊也表示，三跤ﰰ當中，支持度上低的一直攏是陳時中。
