球評潘忠韋抗血癌成功 回鄉分享性命故事

有一个棒球評論者潘忠韋uî,伊佇2冬前致著血癌,透過骨髓移植,已經恢復健康,繼續轉播棒球比賽。伊嘛共家己對抗癌症的過程寫做一本冊,叫做《袂當輸的比賽》,和逐家分享伊的性命故事。

棒球球評潘忠韋,佇台仔頂分享家己對抗癌症故事,講甲喉滇,現場鄉親嘛聽甲真感動,目屎就按呢輾落來。

潘忠韋演講講,「這一關 不知道過不過得了,因為我知道這個狀況,又來得很急很快。」
屏東萬巒圖書館2年前捌邀請潘忠韋回鄉分享伊棒球生涯故事,想袂到演講前一禮拜,潘忠韋發現家己著血癌,活動只好取消,這陣縣府閣一擺共邀請,潘忠韋這回總算轉到萬巒,講家己對抗癌症的過程佮性命故事。

棒球球評潘忠韋,「其實在2019年底的時候,就已經答應要來分享我另外一本書,但是人生的變化球來得非常快,當時就因為得了血癌,花了兩年的時間,這兩年時間讓我的人生有很多很不一樣的變化。」

潘忠韋佇屏東萬巒出世,對10歲就開始摃棒球,是台灣職棒優秀選手,雖然猶閣真少年就退休、離開職棒,毋過伊去做賣厝中人無偌久,就閣轉到球場做球評。想袂到2019年雄雄著血癌,潘忠韋猶原無放棄,楗過艱苦的治療過程,閣一擺轉來到球場。

民眾表示,「我覺得他堅毅不拔的精神、不放棄的毅力,讓我們很值得學習。面對事情是可以好好的去戰勝它、不要怕,然後一次一次地就挺過來了。」

潘忠韋共伊對抗癌症的過程佮心情轉變,寫做《不能輸的比賽》這本冊,共伊堅持毋認輸的精神,分享予鄉親。希望逐家徛佇人生的打擊區,面對變化球,會當摃出suí氣的全壘打。

 

專題|土耳其百年震殤 「鬆餅式坍塌」為何釀禍?

相關新聞