臺北12行政區攏有防災公園 通避難.分配物資

9/18台東花蓮大地動，樓仔厝倒去、甚至幾若條橋也崩去，引起大眾對防災的關注，若是佇台北市發生嚴重災害，民眾敢知影會使去佗位避難？
記者 郭柏均表示：「記者這馬人佇咧台北市內湖區的大湖公園，遮佇平常時是民眾會使來行踏𨑨迌的所在，毋過佇災害來的時陣，遮就會變成一个防災公園。」
台北市消防局整備應變科股長 劉興遠表示：「重大災害發生的時，民眾除了佇厝內做地動三步，結束了後會使直接到外口的空地，佇無法度轉去厝內的時，台北市就會開設防災公園。」
台北市每个行政區攏有配一个防災公園，總共12个，大約會使收容10萬人；若是無夠用，嘛有另外的緊急避難處所等等會使使用。防災公園是臨時避難空間，也是指揮、物資分配的空間，佇民眾到公園避難的仝時間，市府也會確認周邊學校、公共空間的狀況，若是安全無問題，就會共公園內的民眾徙到室內的避難場所。
台北市消防局整備應變科股長 劉興遠表示：「防災公園內底咱大概會有23个項目，分做行政管理類，佮災民收容類，猶有用水設備類，會登記報到的民眾，共收容安置閣有發送物資。」
消防局表示，若發生災難，會透過廣播、市府網站等等管道，向民眾傳達避難資訊。針對平常時防災公園的宣導，會透過網路宣傳、猶是演練等等的活動，向民眾宣傳防災公園的資訊，予民眾知影佇災害發生的時，會使按怎應變。