北市選戰 陳時中.蔣萬安.黃珊珊關注居住正義
郭柏均 林郁凱 謝季潾 台北報導
發布時間：
更新時間：
台北市長選戰3位參選人攏針對居住正義提出政見，陳時中講，4年內欲起5萬7千戶的社會住宅，租金降10%。蔣萬安講，租金閣拍8折。毋過黃珊珊批評，社會住宅要考慮永續經營，講欲增加補助和減少租金，用講的上簡單。
無黨籍台北市長參選人黃珊珊29第一个公開行程就來居住正義分享會。民間企業以包租代管的方式，提供序大友善的居住環境，黃珊珊表示認同。
台北市長參選人 黃珊珊表示，「佇民間行了比阮衝閣較緊的時陣，阮幫忙捒。像這个案件就是代先做，中央才開放旅館轉社會住宅。」
民進黨台北市長參選人陳時中，28也說明家己的居住政策，提出社會住宅4年5.7萬戶、降租金10%，閣有補助政策。國民黨籍蔣萬安，也講社會住宅欲予生第二胎的家庭優先、而且拍八折。黃珊珊批評，發錢佮降租金是上簡單的，政策必需必須要全面思考。
無黨籍台北市長參選人 黃珊珊表示，「社會住宅毋是今仔日點出來，明仔載就會生出來。阮無希望單純發錢、降租，予伊將來破產，重點是予社會住宅永續經營。伊的租金愛合理，若是有需要的人，伊是用租金補貼，另外的社會補貼方式。」
毋過陳時中強調，家己的政策是參考專家學者意見的結果。
民進黨台北市長參選人 陳時中表示，「紲落來愛對這个議題有較深的認捌，會使隨時做修正。柯市府嘛做真久，確實是有一寡仔難度。佗位有難度、按怎解決，嘛毋是用講的就解決。」
蔣萬安嘛剾洗黃珊珊，做袂到的政策，毋通閣再共提出來。
台北市長參選人 蔣萬安表示，「真濟民眾無希望看著真濟過去無法度落實的一寡仔政策，柯規黃隨。(青銀換居)當時台北市政府講早就咧做，但是今年三月才開始，而且執行率是0。」
台北市房地產價數懸，人口流失、出生率低攏是大問題，按怎提供友善居住環境，予市民安心蹛到老，嘛成做各參選人攻防重點。
2022杭州亞運 台灣百金之路
