予臺大判抄論文.撤學位 林智堅:會提告.袂退選

民進黨桃園市長參選人 林智堅表示：「你講敢有予突襲的感覺，當然有予突襲的感覺，因為昨昏批才寄出去，今仔早起就遮爾大動作，開一个按呢的記者會。」
台大學倫會佇8月初9早起公佈審查結果，認定民進黨桃園市長參選人林智堅的碩士論文是抄襲。林智堅連鞭佇下晡召開記者會講，昨昏半暝才寄e-mail予台大學倫會，表達伊欲出席說明的意願，台大煞直接公佈決議，予伊感覺真無辜嘛真無奈。
民進黨桃園市長參選人 林智堅表示：「台大學倫會是按怎遐爾無重視我的權益，為啥物欲予政治介入學術倫理，敢有遐爾急。」
林智堅的律師黃帝穎表示，ﰀ向台大提出法院公證的資料，是會當證明伊的論文是寫佇余正煌進前的，台大煞刁工無採用。
林智堅委任律師 黃帝穎表示：「台大學倫會蘇宏達竟然無視按呢的公證書，法律上的效力，連司法院的官網攏已經公告講，必須承認伊的真實性，竟然佇台大學倫會，比法院閣較大。」
台大的決議內底是認定余正煌並無抄襲林智堅的論文。針對余正煌的律師表示，看著這个結果真安慰，無排除會對林智堅提出侵害著作權告訴，林志堅嘛做出回應。
民進黨桃園市長參選人 林智堅表示：「伊閣講伊欲對我提告，是非敢會使按呢顛倒，這社會敢會使按呢？這已經毋是好心予雷唚按呢，我真正感覺做人愛較古意。」
林智堅競選團隊表示，ﰀ會佇收著處分書了後提出法律行動。林智堅嘛堅定表示，伊袂因為對手的抹烏就放棄參選。