疫情三級苗縣禁移工出外疑侵人權 監察院提糾正

舊年三級警戒,苗栗縣長徐耀昌佇面冊宣佈,苗栗縣的外籍移工禁止外出,引起各界批評是侵害人權,今仔日監察院針對這層代誌,對苗栗縣政府提出糾正。另外監察院認為,疫情期間移工欲收著相關資訊有困難,認為勞動部佇這部份有毋著,也對勞動部提出糾正。

苗栗縣長徐耀昌,舊年6月初7三級警戒的時佇面冊宣佈,因應工廠群聚感染,全縣的外籍移工除了上下班以外,全面禁止外出。28監察院對苗栗縣政府提出糾正,表示苗栗縣政府頒佈這項規定,並無明確法律授權。
監察委員 王幼玲表示:「應該按照指揮官的指示辦理,傳染病防治法度48條講,有接觸傳染病病人,抑是可能有接觸的會使留置,但是問題是苗栗縣政府針對的,是全縣的移工。」
苗栗縣勞工及青年局長 彭德俊表示:「縣政府是虛心接受,未來也會依照監察院的意見,來做相關的檢討佮改進。」
另外,監察院認為佇疫情期間,勞動部欠缺佮移工溝通的管道,雖講有設通訊軟體口座發佈相關資訊,但是加入的人數只有全體移工人數的百分之22,而且佮台灣人得著資訊的時間有落差,所以也對勞動部提出糾正。
監察委員 王幼玲表示:「移工就毋知有佮確診行蹤仝款,無法度趕緊出來接受篩檢,抑是對疫苗的資訊,相信人風聲講的。」
監察委員 王美玉表示:「對移工傷過頭管制,造成怹健康權資訊權侵害的時,國際媒體、人道組織,對咱台灣的批評猶是真嚴格的。」
勞發署跨國勞動力管理組副組長 蘇裕國表示:「阮會繼續拍拚,看佇信息提供頂懸,按怎來做加強。」
監察院補充,今年正月猶有發現其他縣市,有移工予雇主禁止拜六禮拜外出。除了糾正苗栗縣政府佮勞動部,佇外出禁令、移工居住環境、移工失聯等等部份,監察院也請指揮中心、勞動部、移民署愛檢討改進。
 

全台敬老金大調查

相關新聞