雞屎藤劇場新作 "他們的生活"講戰後歌舞人生
洪敏真 莊沛文 / 台北報導
發布時間：
更新時間：
目次
1930年代新劇，會當講是臺灣日治時期，現代劇的起頭，內容對歌仔戲、歌舞劇、日本演歌、武俠劇攏有，多元豐富。佇臺南成立20年的雞屎藤舞蹈劇場，收集10外年的資料，以南臺灣的新劇作家林清文，佮老藝人的真實訪談，做創作素材，捒舞台劇，呈現戰後歌舞團的藝界人生。
佇台頂唱寶島歌王文夏「男性的苦戀」，秀琴歌劇團編導陳米雪老師，這回做法官，搬新劇奈奈子的審判，十外年無見的愛人仔，竟然佇法庭相拄。
秀琴歌劇團編導 陳米雪表示：「演歌仔戲攏比較較重鑼鼓點，尪仔架、跤步手路，但是演這新劇，我愛共遮的物件全部攏放掉，包括我咧講口白，我愛足生活化，愛足自然的」
「新劇」是臺灣日治時期拄開始發展現代劇的名，毋但劇種五花十色，歌仔戲、布袋戲、歌舞劇，內容閣較是包山包海，有日本演歌、西洋羅曼史、武俠劇，是電視電影猶袂出來的時，眾人的休閒娛樂。台南雞屎藤舞蹈劇場的少年導演陳慧勻以南台灣的新劇作家林清文以及老藝人的真實訪談，做創作素材，收集十外年的資料，望舞蹈劇呈現戰後歌舞團的藝界人生。
"他們的生活"舞蹈劇導演 陳慧勻指出：「全台灣可能有五百間戲院，逐工攏有戲咧演。我感覺彼个時代真正足趣味，廖添丁、烏劍人，遮的物件攏是阮咧讀現代戲劇的時陣，攏較少聽著的物件」
擔任這改藝術總監的許春香，也是編舞陳慧勻的媽媽，伊將過去做囡仔，看過的歌舞團像藝霞和烏貓的經驗，敆入這改的作品，伊講真歡喜看著查某囝的用心。
”他們的生活”舞蹈劇藝術總監/編舞 許春香表示：「共古早遐的情況情境，攏共伊演出來予這馬的人看，我感覺嘛是足有意義的」
對日本時期戲院的起落到藝界人士浮浮沉沉的人生故事，雞屎藤劇場望用創新的手法，向台灣劇場的黃金年代表達上大的敬意。
2022杭州亞運 台灣百金之路
