唸歌仙楊秀卿辦告別式 李永得代總統頒褒揚令

唱唸有特殊風格、創立口白歌仔的89歲唸歌人間國寶楊秀卿老師,6/17過身。今仔佇基隆辦告別式,文化部長李永得代表總統蔡英文,頒發褒揚令,感念楊秀卿老師對唸歌藝術的貢獻,也強調會把唸歌做數位化的保存,予這款藝術會當繼續傳承落去。

文化部長李永得代表總統頒褒揚令,予一生為唸歌,走唱70外年的人間國寶楊秀卿老師。

告別式13透早佇基隆市立殯儀館舉行,傳統藝術界攏來致意,綴老師學藝十外年的藝生特別毋甘。

微笑唸歌團團長儲見智講,「阮先生2016年、2017年,就有共工作放予阮做,阮嘛是有夢著老師,攏無病無疼,這馬會行看有,會行會飛,偌歡喜咧。」
臺中教育大學臺語文學系主任林茂賢講,「伊失明閣毋識字,上台了後,對頭到尾全部押韻,這就是咱台灣的遊唱詩人。」

一款歌、百款世,楊秀卿毋但是國寶級唸歌藝術家、無形文化資產保存者,也是口白歌仔的開創者,尤其一人變聲,演各種角色上予人呵咾,文史界煩惱無文字的口白歌仔流失,呼籲政府緊保存。

文化部長李永得表示,「文化部共伊過去佇各地,創作的作品收集起來數位化,予少年人有機會學習。」

除了數位典藏老師表演過的內容,文化部也會舉辦音樂會,紀念老師為文化為土地的疼心,關係唸歌保存再利用版權的議題,文藝界表示,是毋是向台灣共同文化財來做,後續會當來思考。

全台敬老金大調查

相關新聞