屏東半島歌謠祭3/18起鼓 上千人欲傳唱民謠

恆春國小幼稚園的囡仔，綴阿媽的月琴唱出恆春民謠守牛調，看in身軀幌甲誠有節奏，嘛唱甲足歡喜，除了幼稚園，恆春國小學生囡仔嘛有一百人，有人彈月琴，有人唱民謠，in攏報名參加半島歌謠祭千人傳唱。

恆春國小主任 尤正琦：「囡仔攏足愛唱歌，你看拄才遐。後壁彈月琴遐的囡仔，in就是頭先來唱民謠，看學姐in彈月琴，看了足歡喜的，in就共老師講in嘛想欲學。」

這擺恆春國小攏總有164个老師佮囡仔，報名參加千人傳唱，in對頂學期就開始練唱，這站仔是逐工早起自修時間練，老師講囡仔攏誠期待彼工的表演。其實今年半島歌謠祭動員恆春20間幼稚園、學校佮在地居民，有千外人欲做伙佇古城唱民謠。

活動音樂總監 謝徐鳳玉：「一千外个囡仔，阮的壓力是真大。而且規个城壁頂頭下跤攏徛人，閣有拄才搬來的藝人小嫻，伊嘛會徛佇城壁頂tshuā領逐家做伙唱，而且佮台北愛樂做伙合作；這是以台灣歌謠來講，是真大突破佮創舉。」

今年的半島歌謠祭對18到20三工，是疫情過後恆春上大的活動，19暗時的開幕，嘛有恆春囡仔表演的光影戲佮舞蹈，欲用古城頂的民謠歌聲，傳達恆春在地的熱情。