金虎年開拆亞洲"虎"文化 博物館展覽講"虎"事

迎接虎年虎彩頭,佇臺灣也有真濟牽連虎的風俗。親像生相3相虎的人,就有一寡掔損。甚至民間傳說,閣有虎姑婆這種會食囡仔的恐怖故事;毋過,也有親像虎爺公、守護囡仔的神明。虎仔的形象百百款,迪化街的一間博物館就辦展覽,這馬就來聽「虎仔」的故事。

掀開尪仔冊,虎姑婆的故事真濟人攏聽過,恐怖的虎姑婆予囡仔攏真驚。但是虎閣定定予真濟公司當做商標等等,模樣古錐。平平攏是虎,亞洲文化內底,形象煞是百百款。

迪化二O七博物館館長華安綺講,「因為虎的這个音佮好,好物件的這个好是仝音,所以佇咧一寡仔企業的尪仔,企業尪仔攏有虎的形象。」

閣有展出19世紀尾期的繡娘,為囡仔繡的虎頭帽仔,傳統民俗認為按呢會使守護囡仔、平安大漢。毋過相虎的人禁忌嘛真濟,袂使做花童,人生囝嘛袂使入去產房,就驚沖著喜事。因為按呢,搪著虎年,紅嬰仔總是較少。

華安綺也講,「咱相虎的朋友,細漢的時陣攏袂使做伴嫁、花童的身份。逐家攏知影七月半入厝,感覺厝可能較陰,猶毋過相虎氣較旺,會請相虎的人先去厝裡,行行咧、坐坐咧。」

今年是虎年,台北迪化207博物館的「虎年虎事」展覽,tshuā民眾認捌亞洲文化內底,虎的各種文化意義佮趣味的傳說故事。


 

全台敬老金大調查

相關新聞