台3線新竹段新路標看攏無 公路總局下令拆除

六角形的框殼、紅色的底佮白色彎彎曲曲的線條，新竹縣政府最近開欲1400萬，為台三線做標示，做出來煞佮原本的設計差誠濟，民眾看了霧煞煞。

民眾：「因為紅色一般攏是用來警示，所以應該是欲共逐家提醒，後壁的路較彎曲。無(文字)標示，每一个人想法無仝，看了嘛是攏無仝款。」
 

新竹縣交通旅遊處長 游志祥表示：「當初規劃設計，客委會佇報告內底要求，希望用影目的色水，所以阮就按呢處理，紲落來這个標誌若是有任何的意見，阮會聽逐家意見才閣佮客委會討論。」

公路總局指出，這个標誌的色水、寸尺佮圖樣，攏無符合道路交通標誌設置規定，而且嘛無提報計畫，會向相關單位了解狀況，要求依照規定拆除。

電話訪問:公路總局交控中心主任 巫清煒表示：「無符合標誌設置規則，嘛毋是交通牌面，算是一个意象爾爾，會請縣政府先拆除，避免這支牌仔tshāi佇遐 予人看袂清。」

在地議員批評，縣政府開錢裝這奇奇怪怪的標誌，毋但無彩人民的稅金，閣會造成駛車經過的駕駛混亂。