體育署適應體育發展中心 拚培養身心障礙選手

設佇師大的「體育署適應體育發展中心」初七成立。未來會整合各學校的體育資源、佮特殊教育資源，為身心障礙學生設計「適應體育課程」、也就是較適合in的體育教學，除了鼓勵身心障礙學生加參與運動，嘛欲培養有發展性的選手。

帕運柔道選手 李凱琳表示：「早期可能台灣對身心障礙者的體育無遐爾仔支持，所以早期我咧上體育課的時陣，可能課程大部分的時間我攏是坐咧邊仔」

教育部體育署代理署長 林騰蛟也表示：「當然透過這種適應體育，嘛予咱身心障礙的學生，袂成做班級的人客，會使佮一般的學生做伙來上課。發現優秀的人才，帕運抑是聽奧，身心障礙選手一个重要的管道」

身心障礙學生的教育資源已經開始整備，但是佇選手訓練的部份，資源猶是無夠。親像身心障礙選手專用的基層訓練站，就有帕運教練講，已經求足久矣，猶是一場空。

林騰蛟指出：「這个部份阮會使閣來評估，一方面佇阮目前的基層訓練站，除了一般選手以外，嘛滿足身心障礙選手的需求，特別針對一寡運動種類，身心障礙者特有的，阮會來評估設置」

身心障礙選手目前無專屬的基層訓練站、抑是國家訓練中心，in若佮一般選手做伙使用訓練站，敢會有互相搶資源的狀況，未來猶閣需要觀察。