吳鳳科大推世代交流 招囡仔.序大體驗互動教具

嘉義縣吳鳳科技大學最近舉辦藝術創作佮激頭殼的活動,邀請百外名囡仔佮序大做伙體驗,現場嘛發表20件大專、高中職學生設計的教具,希望透過活動增加學生對代間共融的認捌。

序大佮囡仔做伙耍桌仔耍,鬧熱的氣氛予序大感覺真歡喜。嘉義縣的吳鳳科技大學為著欲予學生體驗代間共融的社會責任,邀請四間幼兒園的囡仔佮四間日時照顧據點的序大,體驗藝術創作佮激頭殼的活動。

參加長輩 陳女士講,「我佇厝是老孤老,就是較無伴,若是有出來精神會較好。」

參加長輩 郭女士講,「誠久無佮無仝層次年歲的學生佮囡仔做伙耍,所以誠歡喜。」

除了青銀共融的活動,現場閣有學生佮社區設計規劃的共融教具成果展示,吳鳳科技大學表示,代間的活動攏是學生來規劃佮執行,共融教具的設計嘛是予人感覺誠有創意。

興大附農幼保科 林同學表示,「阮有魚菜共生的概念閣有樹的概念,阮共兩種敆做伙,囡仔會當透過耍這項物仔,來了解這兩種觀念。」

長庚科技大學幼保系 楊同學表示,「阮佇厝的時陣,可能需要一項物件去增加親子的互動,我感覺阮的物件就是會當增加互動的道具。」

教具的設計成果有廠商來現場了解,嘛佮學生討論設計的觀念佮技術。計畫團隊指出,希望透過深度的活動,予幼青銀三種無仝年歲的人互相學習,嘛增加產業界佮學界的合作,替代間共融的趨勢拍基礎。

相關新聞

專題|全台敬老金大調查