高中生辦模擬公投 "大新竹合併"也列做議題

猶未開始投票，現場早就有人排隊，詳細共看，選票頂懸除了重啟核四，猶閣全面禁止瘦肉精豬肉進口以外，閣有大新竹合併的議題，來投票的學生攏感覺真趣味，嘛閣較了解這改全國性公投的內容。
學生：「因為阮18歲欲公投，所以感覺會使提早做準備」。

學生：「阮是竹竹苗的一份子，希望學生嘛對大新竹合併，到底是講啥物會使有了解」。

新竹高中班聯會主席張哲旻：「予學生對社會發生的代誌，嘛知影議題的後果佮看法，猶閣有政治人物的講法，予逐家去思考議題，對本身來講是啥物立場」。

新竹高中的學生家己辦模擬公投，學校嘛真認同學生家己所發起的投票，認為透過活動，學生會當閣較了解公民參與的重要性，用無仝角度看議題，培養思考的能力。

新竹高中訓育組長劉立偉：「透過學生準備欲出社會，佇有公投資格會當投票進前，利用模擬公投活動，培養公民素養參素質」。

連紲三工的校園公投，最後投票結束會公佈結果，做未來政策佮活動參考，嘛趁機會培養學生公民參與的民主素質。