"蔣中正與臺灣"特展 展出違憲未判先註死文件

一張一張的政治案件批示，是蔣中正執政時代，違憲要求加重政治犯司法判決的案件。因應階段性轉型措施，中正紀念堂邀請政治大學台灣史研究所教授薛化元，規劃前總統蔣中正參台灣特展，展出國防外交、社會經濟、文化教育，猶有黨國主義的政治發展

策展人，薛化元教授表示：「白色恐怖時代足濟冤案，但是有一个足重要就是講，這个代誌國民黨高層毋是毋知，總統府臨時行政改革委員會1958年成立，就有一个報告予蔣中正總統，台灣的人權面對啥物問題。」

佇戒嚴參動員戡亂時期，捌有人提出人權改革建議，但並無落實，終其尾當時的台灣毋是民主國家，濟濟蔣中正授權加重判決的文件，也是頭擺佇中正紀念堂展出。

促轉會代理主委，葉虹靈表示：「促轉會過去有針對像講蔣介石按怎介入改判，三千外件的案件有六成是重刑，按怎掌握黨政軍的權力，甚至去介入大法官的會議，像按呢的調查研究，促轉會攏有繼續咧做。」

葉虹靈表示，過去有濟濟學術研究，這陣開放社會同齊討論，以及相關法制的完備佮修正建議，望各界同齊做伙合作，處理轉型正義，這个重要毋過真僫解的議題。