面冊"市集"詐騙.違法買賣濟 立委呼籲修法監管

面冊有一種market-place市集功能,會使予民眾佇頂頭買賣。有立委開記者會指出,面冊的市集內底,有真濟無老實的廣告,甚至是違法買賣的情形,毋過目前無法律會使管理,呼籲中央重視。

點開面冊的marketplace市集功能,頂頭咧賣的物件真濟款,對衫仔褲到轎車攏有。但是有立委指出,市集內面有四个無合理的狀況,包括不實閣無適當的廣告、價數低到無合理、真濟賣家來歷不明、猶閣有違法賣藥仔的狀況。

立法委員 林楚茵指出:「阮有試看覓佮面冊聯絡,但是in是無回應,對遮的代誌嘛攏無回應」

臺北科技大學智財所副教授 江雅綺表示:「逐家會期待遮的數位平台產業,伊會使自律,但是阮最近看著真濟內部的搤空者,In已經徛出來,自律無效,需要立法的介入」

面冊目前算是境外電商,台灣無法律通管理,而且面冊佇台灣的辦公室,嘛干焦負責行銷業務。針對遮的問題,NCC佮經濟部表示,因為是境外平台,確實真僫管理。

國家通訊傳播委員會綜合規劃處處長 王德威講:「阮這馬當咧擬訂數位通訊傳播法,就是參考歐盟的歐盟數位服務法DSA,伊第一項就是遮的網站應該愛佇國內落地,愛有登記,至少愛有法律代理人」

經濟部商業司專門委員 許福添指出:「因為marketplace算是個人平台,就變成是阮私底下的買賣,目前猶無這款買賣案例,會使透過消保法處理」

經濟部干焦會使提醒民眾,佇網路平台做買賣一定愛細膩,避免受騙。NCC講,因為是境外平台,目前連警方欲調查案件,攏真困難。在場立委是要求愛趕緊修法,確保民眾權利。

相關新聞