嘉義宮廟調查客庄祭祀文化 招劇團搬地方故事

國小的囡仔，唱出客語歌謠，嘉義縣中埔鄉四十九庄保安宮，結合劇團、布袋戲、歌謠，演出在庄神明的故事。傳承中埔當地的宗教文化，

觀眾涂小姐講，「因為阮這馬中埔的客人，差不多第二代、第三代攏袂曉講客語，透過活動的演出，予囡仔轉去會想講，活動的客語是咧講啥物意思。」

中埔頂六國小校長吳淑茹表示，「其實阮佇客家人精神的部份，會對信仰這方面來開始，然後結合客語的學習，其實是予囡仔會當深入了解當地文化的傳承。」

四十九庄保安宮有將近300冬的歷史，是中埔地區的信仰中心，為著欲予少年人認捌故鄉的歷史，廟方佮中埔鄉公所合作，毋但揣學者調查，閣請劇團共調查的結果編劇，搬戲予囡仔看。

嘉義縣中埔鄉長李碧菁表示，「阮有請雲科大一位老師來做田野調查，主要是針對阮四十九庄保安宮，因為伊本身就有誠久的歷史文化，是對清朝的時陣就有存在矣。」

中埔四十九庄保安宮主委郭明彰講，「因為四十九庄就是表示講，伊當時界管的區域有49个庄頭，就是包括中埔鄉、阿里山鄉、大埔鄉三个鄉。」

公所表示，這改的演出，除了有兒童劇團，嘛有請在地的藝術團隊佮學校做伙來演出，希望保存地方歷史，嘛增加囡仔藝術文化的學習。