嘉義文化路中秋滿人陣 衛生局嚴查防疫作為

中秋這四工的假期,各地頭的觀光景點,人攏洘洘;嘉義市文化路夜市嘛仝款。市府表示,衛生局攏有隨時去巡,看店家敢有做好防疫措施。

市府人員攑牌仔,佇文化路夜市內底向遊客宣導,嘉義市文化路佇連紲假期的暗時,攏有誠濟遊客會來到遮,市府嘛加強相關的防疫措施。

遊客洪小姐:「逐家的觀念閣袂䆀,所以攏會主動,看著有QR code攏會主動去掃。」

嘉義市政府衛生局稽查員林嘉惠:「買物件了後會當轉去才食,毋通那行那食,因為猶是有發見消費者有這種狀況。」

商家表示,連紲假期前三日,暗頓的時間人會沓沓仔變濟,攏是外地轉來的遊客,嘛攏有做相關的防疫準備,而且衛生局嘛會隨時來檢查。

文化路商家焦先生:「已經三四個月無遮好矣,人潮大約七八成;無較早遐爾好,只有七成到八成爾爾,(生理)有轉來但是無遐濟人。」

文化路商家戴小姐:「並疫情期間好欲七八成,就是這幾工的連紲假期。」

嘉義市建設處表示,中秋假期的前三工、暗時七點半至九點半是人上濟的時陣,所以嘛有配合文化路商圈自治會,佇各路口實施實聯制,嘛有加派人宣導防疫規定,希望莫因為假期造成疫情的傳播。

全台敬老金大調查

相關新聞