新竹橫山鄉1人發1千 9/15戶口在當地者攏通領

橫山鄉民表示：「按呢誠好，非常好。會當買一寡生活用品。」

民眾一聽著有1000箍通好領，攏笑咍咍。新竹縣橫山鄉民代表會16同意公所佇11月，針對9月15進前戶口佇橫山鄉，無論歲數的民眾，發放1000箍的現金紓困。

新竹縣橫山鄉民代表會主席，古鋓明表示：「雖然講干焦1000箍，毋過嘛是有一部份的幫忙，我想代表會一定會支持予鄉民，代表會絕對無意見通過。」

橫山鄉長講疫情嚴重影響鄉親的生活，尤其是佇內灣做生理的店頭，希望透過直接發現金的方式，加減幫助逐家。

橫山鄉長，張志弘表示：「共今年預算加出來矣，今年度統籌分配款，轉換做防疫紓困金，發予鄉民度過疫情，當然1000箍無偌濟，毋過對庄跤人來講，上少會使負擔一個月的用電錢。」

目前初步估計有1萬2500外人會使領著這1000箍，鄉公所希望民眾會使配合中央發的五倍券，做伙提升橫山鄉的經濟。