幼兒園確診家長的同事.家後確診 疫情湠入桃園

新北市幼兒園群聚感染的案件,這馬是湠甲桃園去矣。桃園9/12新增加1例,也就是案號16197,是1个男性,這个男性佮幼兒園群聚案的1个學生的家長,𪜶兩个人是同事。這个確診者𪜶牽手,嘛去予穢著,另外,因為這个確診者,捌去診所予醫生看,診所內底的8个醫護人員,今嘛夆匡列矣。抑若新北市9/12嘛新增加1例,是幼兒園群聚案內底,1个確診的囡仔穢予𪜶阿公的,這个阿公佇咧居家隔離的期間,驗出陰性轉陽性。

新北市幼兒園群聚感染,12閣增加2例確診,其中一例是確診的囡仔穢予蹛做伙七十外歲的阿公,這个阿公予人匡列,而且佇咧居家隔離的期間,驗出陰性轉陽性。

新北市長侯友宜表示:「這个個案是幼兒園群體染病的事件,內底的囡仔穢予𪜶序大人,隔離一段時間了後,閣做PCR的時陣,驗出來陽性的確診個案。」

新北市幼兒園群聚感染也湠去甲桃園矣,桃園新增加的案號16197,佮新北幼兒園群聚案的1个學生的家長,也就是案號16152,𪜶兩个人是枋橋工課場的同事,𪜶牽手嘛去予穢著,驗出確診,抑若兩个名囝目前檢驗是陰性。案號16197,初6早起搭712公車去土城,才閣盤捷運去枋橋上班,欲暗仔搭710或者是712公車轉去桃園。因為伊猶捌去診所予醫生看,目前已經匡列診所內底8个醫護人員。

桃園市長鄭文燦:「雖然進前做兩改快篩佮PCR是陰性,9月11採檢是陽性,這間診所8个醫護人員跟員工,嘛有共匡列居家隔離,而且安排採檢當中,佇咧看病的時陣,並無其他的病人,所以伊的行蹤是較單純的。」

抑若台北市新增加1个本土病例,是1个20外歲的女性,蹛佇艋舺,是一个做餐飲業的人員,目前感染源猶愛調查。新北市幼兒園的群聚案,目前累積確診人數是29例。採取預防性停課的3間國校仔佮4間幼兒園,到11為止,902人採檢結果是陰性,猶閣有3間學校,292人猶佇咧居家隔離當中。


 

相關新聞