行政院擬發振興券 在野黨:分現金才有影紓困

行政院敢有欲照舊年三倍劵的模式，閣發振興劵來救餐飲旅遊等等業者，受著真濟關注。毋過閣有一派認為應該普發現金，先予民眾提著救命錢才來考慮救經濟。民眾黨立委賴香伶表示，「共20%高所得者排除在外做全面性普發，予勞工參弱勢者莫閣予制度成做紓困孤兒。」

台灣無條件基本收入協會也用美國、日本等國家的現金紓困經驗, 認為發現金是上緊、上簡單的。台灣無條件基本收入協會理事賴君怡講，「對欠現金的人來講，提現金去買日常必需品，現金對伊來講就是紓困，商家若足需要倚靠金流周轉，現金就是企業經營的命脈。」文化大學法律系教授邱駿彥說明，「掠準目的是欲刺激內需，愛幫助景氣受難的，景氣䆀影響較大的行業，這時陣若發現金，無一定通真正會攏用佇內需方面。」

毋過民進黨立院黨團表示，各部會有各種紓困措施予民眾申請，這馬上重要是救內需型產業，無若倒愈濟愈濟人失業，欲發佗一款著愛考慮上大效益。