環南第3擺驗PCR 北市3市場推動疫苗通行證
發布時間：
更新時間：
臺北市環南市場今仔日做第三擺PCR篩檢，這擺的採檢干焦針對熱區做篩檢。副市長黃珊珊嘛宣佈濱江、北農、環南這三个市場，未來會使用疫苗通行證，來檢查出入的人員敢有篩檢、注疫苗。
擔仔商排隊排好勢，環南市場15這工由榮總負責，替逐家進行第三擺的PCR篩檢，但是這擺佮頂過無仝，毋是全市場的擔仔攏來檢驗。
台北市副市長黃珊珊講，「頂過有驗出三个，對這三个的熱區閣去篩檢，無全部篩檢的原因是佮中央討論的結果，但是大部份的人猶是會來篩檢，若是會使，榮總下晡暗時就會予阮結果。」台北市長 柯文哲表示，「今仔日做1675个，阮閣看今仔日的效果怎樣，而且咱疫苗理論上到今仔日應該開始有效果。」
15嘛開始推捒市場的通行證件，用悠遊卡佮健保資料庫連結，掌握每一个擔篩檢佮注疫苗的狀況，嘛紀錄出入市場的時間。
台北市副市長黃珊珊講，「今仔日(15)就會開始用會長手中的這號做疫苗通行證，In未來就會有家己的工作識別證，未來當作注過疫苗，才會使入來的一个管制方式。」
黃珊珊講，每一个市場的條件攏無仝，疫苗通行證件閣愛看狀況，才來決定是毋是全台北的市場攏欲捒，這馬會對濱江、北農、環南三个市場先推行。伊嘛表示，今仔日篩檢的結果出來，若是一切無問題，環南市場應該就攏安全矣。
