高雄凱旋夜市7/17恢復營業 按嚴格管控人流

最近有一寡夜市仔沓沓仔解封，高雄的瑞豐夜市，進前才拄恢復營業。另外，已經停業兩個月的，凱旋青年夜市，今仔日嘛宣佈，欲佇7/17恢復營業，毋過出入口嘛會減少到賰3个，目的就是欲管制人數，進行實聯制。

來到凱旋青年夜市仔，冷冷清清，遮攏總650擔，已經兩個月無營業，因為最近咧討論放冗解封，業者等袂落去，夜市仔準備17號後禮拜六恢復營業。凱旋青年商圈夜市主委劉坤松表示，「這款放冗解封部分，真濟親像百貨，耍的應該無法度做，干焦食的部份，若有做看敢有兩三成攤商出來做。」

因為規个凱旋青年夜市有1萬2千坪，範圍真闊，經發局人員嘛會同警方來現場勘查，了解夜市仔若是恢復營業，根據中央的辦法，愛按怎管控人數。

高雄市經發局副局長高鎮遠講，「簡化出入口，到時陣17號場地，會變成單一出入口，這部份除了業者家己進場管制，磅體溫、執行實聯制，到時陣嘛麻煩前鎮分局協助做人流管控。」

其實高雄瑞豐夜市頂個月就先恢復營業，目前干焦三成出來排擔，人客嘛差不多兩成，生理無好，凱旋青年夜市仔遮的業者，靠紓困停業兩個月，猶是希望先恢復，才沓沓仔等全面開放。