臺大陳文成廣場 校方指碑文傷政治.學生會不滿

白色恐怖受難者,臺大校友陳文成,1981年自美國轉來臺灣探親,煞佇特務人員約談了後陳屍臺大校園。7/3事件發生滿40冬,臺大校務會議最近嘛通過陳文成廣場的碑文設置,但是對廣場說明牌的文字閣有意見共否決,引發學生會的不滿。

碑文寫著紀念一位堅決抵抗國家暴力的勇者,二月初台大學園內陳文成紀念廣場開幕,才因為校方對碑文國家暴力這幾字有意見,引發用phoo-lí-lóng暫時刻字,開幕了後閣拆除的爭議。經過學生會爭取,最近碑文總算佇校務會議中通過,只不過這改校方又閣否決園區內底說明牌的文字,理由是傷過激進、傷政治化。

台大學生會長楊子昂說,「阮這改說明牌有共促轉會最新的報告,就有囥佇說明牌內底,閣補上紀念廣場設立的由來,猶閣當初學生的設計理念等等。」

學生會表示,校方認為寫陳文成誠成功的部份就好,莫寫受難事件,這種想法根本停佇威權思維,無教育意義,會繼續佮學校協商,也無排除訴諸輿論,另外初三就是陳文成受害40冬的紀念日,因為疫情關係,原本實體的活動也延期。台大學生會長楊子昂說,「變小型的線頂活動,就是阮會邀請逐家佇陳文成事件紀念廣場,進行打卡翕相紀念按呢。」

對學生會爭取園區說明文的代誌,台大表示猶是會遵照校務會議的表決執行。另外,促轉會初一針對陳文成的白色恐怖受害案發表聲明,講相關調查工課閣咧進行,建議檢方重新調查。陳文成基金會嘛表示,希望政府負起調查的責任。

相關新聞