勞工紓困貸款暫停收件 22間壽險開辦保單貸款

勞工紓困貸款因為名額比舊年少、申請人數傷過濟,目前先暫停辦理。金管會壽險公會等等的單位表示,只要佇22間壽險公司有保單,一間公司上濟就通申請10萬箍的紓困金,七月開始辦理。

勞工紓困貸款因為申請人數爆量,暫停辦理,毋過,有需要的民眾也先莫著急,若本底就有保險,這馬也有機會向投保的壽險公司申請紓困金,壽險公會理事長黃調貴表示,七月起,民眾就通佇22間壽險公司申請。黃調貴講:「一个申請者,伊佇一間壽險公司的總金額是十萬箍,你若有五張,五張攏會當貸款,但是加起來也袂當超過十萬。」
 
壽險公會表示,會照各公司的條件來審查,六月底進前公佈規範,申請時間對七月到九月底為止,原則上一間公司上濟借10萬,利率1.28%,比勞工紓困貸款的1.845%閣較低,若有佇幾若間公司投保,就通攏借。毋過欲紓困也兼具防疫,金管會就希望保險公司執行專案申請時會當莫接觸。
 
金管會保險局主任秘書蔡火炎:「可以用傳真、網路,抑是用翕相,來送保險公司做申請,另外佇審查標準流程愛妥善規劃,避免短期有大量案件入來。」

針對壽險業者加入紓困,做伙佇線頂討論的立委也表示,希望各壽險業者愛研議一套資格,也希望通閣共借的金額提懸、放冗民眾的申請條件,速度愈緊愈好。

全台敬老金大調查

相關新聞