歷來上嚴交流道限制 假期第1工六都上國道總窒

今仔日是五日節連紲假期頭一工，交通部嚴格管制交流道，對11暗時到12下晡，真濟所在若欲上高速公路，是攏窒甲誠嚴重。高公局預估今仔日規工車流量大約53百萬車公里，抑若氣象局表示，「小熊」風颱已經佇今仔日下晡形成，毋過對臺灣無直接影響，後禮拜一受西南風影響，南部地區雨水會較厚。

就驚疫情佇五日節假期湠開，交通部捒出有史以來上嚴格的匝道管控制度，紅燈秒數重倍，上長有35秒，國道1號五股、桃園、湖口、台中和國道3號中和、南深路接國5南港系統，對12早起到下晡，攏出現欲上高速的車陣
 
管制措施嚴，袂少交流道路口攏有警察指揮，不過也影響袂少上班族和物流車，交通部中晝是緊放冗 14个物流車較濟的交流道，增加青燈的秒數。
  高公局表示到12下晡三點為止，全線的交通量大概是30.5百萬車公里，估計12規工會是53百萬車公里，和舊年仝期減55%，確實有效管控長途的車流。天氣部分，氣象局表示今年第四个風颱小熊已經佇下晡形成，對台灣無直接影響，這兩工各地天氣攏燒熱，到14過受西南風影響，南臺灣降雨就會較明顯。