2018年美國順天美術館和文化部簽"捐贈意向書"，由國立臺灣美術館來接收，保存藥學博士許鴻源先生，在生進前收藏的臺灣藝術品。最近國美館特別選195位藝術家的作品辦展覽，欲予民眾做伙欣賞，臺灣美術發展百冬的風采。
行入國美館這个展場，第一眼就看著畫家李梅樹替許鴻源翁某所畫的畫像，策展人表示，真少賣圖的李梅樹，其實是受許鴻源的真心佮堅持感動，除了替這張畫像，猶有一幅透早魚市，嘛是真罕得看著的作品。
策展人蕭瓊瑞:「李梅樹的作品有一幅畫我的故鄉，澎湖的彼个魚市場，拍殕光的時陣，市仔轉來佇遮咧拍賣，魚市場鯊魚一尾足大尾，這攏是咱較早罕咧看的。」
另外這幅湖邊月色，是畫家陳景容佇1981年完成的，寧靜、有淡薄仔哀愁，是陳景容的特色。
畫家陳景容:「畫彼張是湖邊月色，伊拄好穿白衫，手提一隻鳥仔，白衫後壁畫湖邊、月娘，講起來是誠特別，誠寧靜的感覺。」
策展人蕭瓊瑞:「所以咱這遍照遮的年代，有的攏超過一百歲，有的是第二代藝術家，有的是戰後的，戰後佮第二代藝術家中間的，分做四个階段，按呢咱會當看出這四个階段，遮的人包括台灣各階層，逐个無相siāng的族群，但是有伊時代的特性。」
台灣西洋美術重要的開啟者，石川欽一郎的作品，佮伊的學生陳澄波、李梅樹等人的畫作；台灣知名膠彩畫家陳永森、林之助、蔡草如，猶有台灣近代美術家親像薛保瑕等等的畫作，總數671件順天美術捐贈的收藏品，也攏會做完整的數位典藏。
文化部次長蕭宗煌:「文化部、國美館會將遮的作品修復了後，攏總做數位掃描，閣做伊資料的詮釋，攏總囥起去網路頂懸，囥網路等於你若欲研究的人，就會使透過網路來了解遮的作品，來做研究。」
除了數位化，為著落實文化共享、開放的目標，文化部也歡迎各界借展，予作品有機會佇北中南各地頭展出，將遮的珍貴作品分享予閣較濟人。