臺南新市國小，成立一个口說藝術團，團員攏是國小學生，in用臺語上台表演跳舞唸歌，這個月閣欲巡迴臺南八間學校演出，透過囡仔古錐的表演，順紲教其他學校的學生講臺語。
學生佇台仔頂趣味閣活潑的表演，不管是牛、貓仔抑是大目水雞，大家攏做伙唱歌謠。
臺南新市國小的口說藝術團，來到歸仁國小，表演這齣內山囝婿揣頭路，台仔跤的囡仔姊、囡仔兄攏看甲真歡喜，口說藝術團為著這擺表演，才排練三禮拜爾，in全程攏用台語。
學生王慧茹:「我學了兩個月，我是五年仔，感覺趣味的所在就是，老師會教阮唱跳方式。」
學生家長洪暄堯:「佇厝裡就會佮厝內人說台語，轉來就活潑亂跳，教妹妹唱唱跳跳。」
新市國小台語老師劉惠蓉:「囡仔上台的時陣有自信，語言教育就是愛趣味，囡仔佇台仔頂咧表演，看著台仔對咧學，囡仔對囡仔學，是上蓋好學習的行動，上重要的是，囡仔學台語，爸母敢袂做伙來。」