藥學博士-許鴻源，在生進前，收藏600外幅的臺灣藝術品，伊的後生，也遵照老爸的心願，共這寡收藏品，大部份攏捐轉來臺灣。2019年送轉來臺灣了後，由國立臺灣美術館保管佮應用，嘛予重建臺灣藝術史的計畫，有閣較豐富的資料通好應用。
1993年佇美國成立的順天美術館，是藥學博士許鴻源的夫人，許林碖女士和子女所成立的，順天美術館內底展出濟濟許鴻源收藏的台灣藝術家作品，2017後生許照信遵照爸爸許鴻源的遺願，欲將收藏品全數捐轉來台灣。
策展人蕭瓊瑞:「一直到2017的時，就開始想講欲共遮的物件送轉來台灣，這是伊(許照信)老爸一世人的願望。」
許照信表示，爸爸是咧思考，會當替台灣留啥物物仔予後代子孫，所收藏的作品其實就是台灣的一个歷史，會使看出台灣人，彼當時是按怎生存，按怎咧拍拚。
許照信:「伊有兩本畫冊，頂頭寫甲真清楚伊講這毋是阮的資產，等台灣的情形較好，你愛提轉去台灣，所以這就是伊的交代。」
經過兩年外的溝通，這批迒世紀的台灣美術作品，佇2019年全部運轉--來台灣，這批畫作的收藏年代，嘛拄仔好是台灣國際局勢出現變動的時陣。
國美館典藏組組長薛燕玲:「就是1979年到許鴻源博士過身，大概11年的時間，嘛是台灣退出聯合國，1971年咱退出聯合國，佮國際斷交 風雨無根的時代內底，彼个時陣伊開始來收藏。」
許鴻源毋但是一个收藏家，也是一位捐贈者，家屬願意無私將規批的畫作捐予國家，也予文化部當咧推動的「重建藝術史政策」帶來真大的動力
文化部政務次長蕭宗煌:「但是(當年)臺北美術館咧收藏的時陣，收藏的物件是一步一步來。一步一步來就是講，美術館的典藏經費一冬的典藏經費偌濟錢爾，偌濟錢爾會使買幾張圖，買幾个藝術家的圖，等於講算佛做粿，真濟藝術家的作品其實攏無，伊(許鴻源)拄好攏有，因為伊用藝術家美術史的方式，一个藝術家一張，若有法度的時陣閣加一張，所以伊藝術家的系譜顛倒較完整。」
許鴻源佇台灣猶未民主化的時陣，就開始為著臺灣的藝術，四界奔波，並且收藏只為著有一日欲還予國家，無私大愛的精神，替台灣留下完整的文化記憶。