2014年的太陽花學運，有濟濟的學生、公民團體、民眾參與。雖然逐家攏熱心參與，毋過煞有人發見講:台灣人對國際情勢的理解較欠缺，就有少年人製作線頂節目，用輕鬆自然的方式，佮聽眾互動，討論國際議題。

調整相機、確認器材，準備好勢，開始今仔日的討論主題。

兩人自然親像開講，輕鬆的氣氛，講的內容是重大的國際新聞，Kylie佮KEN有佇外國讀冊的經驗，2014太陽花運動的時，兩人攏有去現場了解狀況，但是in煞發見台灣的少年人其實無啥了解國際的局勢。

KEN表示，伊佇中國讀冊的時陣，看著中國人攏開真濟時間咧看各種資訊，就驚落勾去，顛倒是當時台灣的國際新聞，內容較欠議題探討，in就開始翕短片、發宣傳單，試各種辦法，希望民眾對國際新聞有興趣。

Podcast節目製作到今，兩个人對原本兼咧做，變成主要的工課。嘛有佇傳統媒體做節目的Kylie，也點出這陣網路媒體會遮爾興的原因。

講話就是遮爾直接，加上有淡薄仔趣味，予in佇網路頂有一篷死忠的聽眾，Kylie佮KEN講做節目毋驚別人批評，有意見代表有人看，意見無仝代表有討論的空間，未來in嘛欲繼續用家己上自然的方式，鼓勵逐家講出想法，同齊討論國際新聞。