臺灣豬標章 來源標準僫掠定.中央把關引質疑

為著予民眾安心的台灣豬認證標章，到今猶有真濟問題，親像有一寡大賣場佮餐飲店，有貼標章，煞無完全使用國產豬肉。所以政府這馬欲加強稽查，不過跤手有限，會當替人民查到啥物程度，來看詳細的報導。

標章、標示、產地註明、萊劑註明，對豬砧到冰櫥，四界攏看會著，對舊年講萊豬欲袂入來到今，民眾敢會煩惱去食著精肉精？
看會著肉大部分攏有標示產地，不過看袂著原料，像火鍋料、肉包、水餃等等冷凍豬肉加工品，有的只有寫產地台灣、台灣製品，不過毋知影敢有摻著進口肉。

衛福部愛民眾放心，不過標示干焦註明產地來源，並無強制規範業者愛標明敢有含精肉精。農委會也捒出台灣豬標章認證，不過進前發生大賣場和連鎖餐飲店業者毋是百分百使用國產豬，結果標章猶是被撤回，信用破功，衛福部也因此增加四分之一的人力，全台灣百外人，加強稽查標示，雖罔政府針對標章、標示風波當咧補破網，不過會當把關到啥物程度，民間團體猶是存疑。