為省錢.無照程序行 誠濟民眾倩著非法移工

台北市勞動局表示,最近有袂少民眾敲電話講,倩著失聯移工,也反映出頭家為著加省錢,抑是等無工,無行正常申請管道來造成違法。勞動團體就表明,這咧情形,也顯示頭家心態應該愛改變,袂當直直抱著俗閣大碗的心態。

外籍看護捒輪椅陪長輩出外曝日頭,序大有人看顧會使講誠幸福,毋過嘛有人拄著問題。

市府表示,經過調查,有誠濟病人家屬,因為臨時需要,煞來相信一寡不肖業者,無經過合法管道倩外籍看護,結果真濟根本是新移民的女性,或者是留學生身份,想欲偷食步,煞顛倒違法。

市府講,欲避免踏到違法線,上重要就是愛查證。毋過這種雇主貪俗,揣無外籍看護,閣毋願加開錢請本土看護。工貴 ,反映的也是慣勢負擔低薪水的結構問題。

勞動團體點出,過去頭家想欲俗閣大碗的觀念著愛改變,若無,直直倩無工,違法聘僱可能會愈來愈濟。

 

全台敬老金大調查

相關新聞