中天新聞台轉戰網路 按怎久長經營成做挑戰

中天新聞台的電視頻道,昨昏行入歷史,今仔日開始改做網路播送,不過網路經營的收入,敢趁有夠往過中天做電視的成本咧?而且網路頻道的內容設計和收看的族群,攏有精差,今這也是中天未來愛面對的挑戰。

經營26冬的中天招牌求重生,對電視徙來網路24點鐘直播。

主播佇線頂繼續放送中天新聞,而且參網友互動,若對網路平台的注文人數來看,12號早起就欲到百九萬人,觀看人數嘛有3至4萬,比對其他新聞台,會使講誠濟人咧關注,毋過這款聲頭,若繼續照過去的模式製播新聞,通維持偌久?

大數據公司的營運長林慧珍講,真濟新聞台攏有經營網路,毋過目前較無經營壓力。中天新聞若干焦照往過的方式做內容,欲行久長確實是挑戰。掠準閣用其他網路新聞業者的經驗,可比 etotday或者是udn,用閣較多元的題材經營,甚至網路購物來維持,敢是會當試的出路?

若照網路專家分析,中天轉戰網路,對內容、原本的目標族群敢守會牢、以後的核心價值會是啥,攏是連鞭就愛思考佮面對的考驗。

相關新聞

專題|全台敬老金大調查