"刺蔣"50週年 黃文雄.鄭自才堅心追求民主

蔡瑞月舞蹈社,今天舉辦舞蹈節的開幕會,專工邀請2位民主先輩,是參與刺殺蔣經國無成的黃文雄,佮伊的妹婿鄭自才。嘛安排兩個前輩頓手印,代表共"替人權奮鬥"的精神留落來。

撒烏瓦知部落族人,佮眾人踅蔡瑞月舞蹈研究社3擺,隊伍內底,80外歲的黃文雄,佮伊的妹婿鄭自才兩人,也是第十五屆蔡瑞月國際舞蹈節開幕,特別邀請的貴賓。兩位民主前輩,嘛分享50年前兩人佇美國,是按怎會共同籌備彼場轟動全世界的刺蔣行動。

今年是刺蔣事件50週年,黃文雄的演講,共時間搝轉去1970年4月24日,彼陣佇美國留學讀社會學博士的黃文雄,趁彼時陣猶是行政院副院長的蔣經國訪問美國,開銃暗殺失敗,一粒銃子改變伊的一生,流亡海外25年,妹婿鄭自才嘛坐監,行過歲月,無變的是對國家民主的追求。

鄭自才向台灣社會講出家己的向望,兩位民主前輩將手印頓佇模仔頂面,象徵行過50年的黑暗期,嘛透過掛標語的儀式,傳達予少年人爭取自由人權的理念。

相關新聞

專題|全台敬老金大調查