臺鐵南迴線電氣化 枋寮"火車踅翻頭"欲變歷史

屏東枋寮接臺東的臺鐵南迴線電氣化,佇12/23就欲通車,枋寮車頭的車幫會增加,抑若這站仔逐家搶欲坐的藍皮火車,閣有罕見的火車踅頭畫面,真濟遊客攏走去到枋寮車頭看。
 
火車母勻勻仔駛入轉車盤。

原來這種古早食油的火車踅頭,攏靠這个轉車盤,原底每一工透早佮下晡,佇枋寮車頭會使看著罕見的火車踅頭畫面,毋過23南迴線電氣化通車了後,就無地看矣。

枋寮站是南迴鐵路的起站,才有轉車盤的設備,是真罕見,早期無電愛用人工捒車盤,這馬這種古早時代的畫面,將欲無矣,民眾來枋寮站懷念古早時代,閣有來坐藍皮火車。

嘛是因為南迴線電氣化欲通車,枋寮車頭逐工一班的藍皮火車,就算是平常日,已經加掛兩節車廂,嘛滿滿攏是人,佇枋寮站已經36冬的資深員工,對這班普通火車感情閣愈深。

黃祝講,這幫車有in媽孫仔三代的回憶,這馬看著遐爾濟遊客搶欲坐,懷念古早味,枋寮車頭嘛變較鬧熱,伊攏會主動共遊客鬥翕相。

配合南迴線電氣化,枋寮車頭當咧整修月台,未來提升變二等站,會增加普悠瑪、自強號的車幫,地方嘛希望古早味的轉車盤,抑是藍皮火車等等,會當保留,帶動枋寮觀光,予枋寮站閣再一擺鬧熱起來。

相關新聞

專題|全台敬老金大調查