恆春國校教民謠.彈月琴 打狗亂歌團記錄過程

人講恆春半島是月琴的故鄉,佇恆春足濟國小,攏開始予學生學彈月琴、唱民謠。除了當地傳藝師教學生,也有真濟老師做伙參加。打狗亂歌團的成員,嘛長期陪囡仔做伙學,閣用鏡頭紀錄遮的過程。


用思想枝的調,唱出家己寫的詞,這兩个恆春國小南灣分校二年仔的學生,當咧練習比賽歌曲,in遮爾細漢就會曉彈月琴唱民謠,因為學校對六冬前開始教囡仔,老師閣用心紀錄民謠曲調寫做樂譜予囡仔學。

吳老師原本是台語老師,為著教囡仔,家己嘛學彈月琴,毋過上困難的代誌是,共傳藝師唱的歌謠寫做樂譜,另外,伊嘛會教囡仔用台語寫詞。

毋但傳統民謠,共月琴佮陣頭結合,學生那表演那耍,逐家攏足歡喜,民謠文化慢慢仔佇恆春的國小釘根生湠。

打狗亂歌團成員最近拍這支影片,記錄恆春地區的國小,佳哉有這陣老師,做伙傳承民謠文化。

打狗亂歌團長期佇恆春陪伴,看著老師遐認真拍拚,逐家攏向望,毋通予遮爾媠的在地民謠無去。

全台敬老金大調查

相關新聞