黨產會認定美齡樓是不當黨產 婦聯會否認

黨產會今仔日針對婦聯會名下的美齡樓以及土地,總共價值10億5千萬,進行聽證程序。婦聯會主委雷倩強調,美齡樓是對民間捐助所買的,受著憲法的財產權保障。

這棟9層樓懸,起佇台北市林森南路19號,外壁貼粉紅tile(磁磚)的大樓,就是婦聯會佇1996年由婦聯社會福利基金會,用6億買土地,佇2005年,開4億5千萬起的美齡樓。

這陣黨產會調查認定美齡樓的建物和土地,是婦聯會不當取得財產的現存利益,佇初七舉行聽證程序。不過聽證會猶未開始,婦聯會代理人徐履冰律師是先出聲,請黨產會說明辦聽證會的必要性,質疑有程序問題。

黨產會認為計共10億5千萬的土地和建物若準講真正是婦聯會用稅捐得來的資金起的,著愛沒收,成做國有。不過婦聯會主委雷倩掰會這款的講法。

雷倩強調並無所謂的不當黨產,資金是進出口工會和民間自發性捐的,並毋是政府的稅捐,黨產會表示後續會繼續調查,才閣決定是毋是閣辦第二擺的聽證程序。

九合一選戰解析

相關新聞