在疾管署拄才的記者會中，指揮官陳時中表示，全中國攏已經是疫區，因此提高防疫等級，只要捌去中港澳旅遊過的人士，攏愛佇厝隔離觀察14工。目前全世界「武漢肺炎」診斷確定的人數，猶原一再咧增加，咱來看到甲下晡兩點，上蓋新，統計出來的患者有偌濟。

中國，目前有2萬4千3百6十6个病人，診斷確定，致病過往的，有4百9十2个，抑香港有18个病例，其中一个不幸死亡。咱台灣，現此時確診的病例，是11个。／亞洲這爿，目前是日本，33个患者上蓋濟、泰國25个、新加坡24个、南韓有16个。／地球南半爿的澳洲，嘛有13个；另外，西洋國家這爿面；德國有12名病例，美國11个、法國6个，加拿大嘛有5个診斷確定的患者。／抑歐洲西爿的比利時，昨昏嘛驗出頭一層案例。全世界，計共已經有26國，有驗出「武漢肺炎」的患者囉。