趨湧列入亞運項目 尤佳琦亞錦賽提著資格

選手踏佇枋仔頂懸，綴著海湧的起起落落做出各種精彩的動作。來自咱台灣的屏東囡仔，尤佳琦，舊年佮另外一位選手詹博宇，參加亞錦賽，順利提著2026名古屋(Nagoya)亞運的參賽資格，今年初也提著國內亞運衝湧選手的培訓資格，不而過落尾運動部公布名單，煞無欲派in兩人去日本比賽，予尤佳琦的阿母誠不滿，因為伊知影囡仔為比賽付出偌濟心力。

尤媽媽:「這个門票是國際組織的認可，認可恁台灣有實力，為啥物咱兩位選手袂當去參加。尤佳琦、詹博宇in是這馬目前臺灣上強的兩位選手，嘛是上有希望提牌的選手，日本攏已經認證，為啥物臺灣毋認證。」
 

衝浪愛好者:「咱臺灣的水準無佮國際這爿去相接，所以佇咧國際認可的時陣，臺灣家己煞擋牢咧，所以我感覺這是非常非常可惜的代誌」

衝湧佇臺灣毋是主流運動，這回嘛是頭改列入亞運的正式項目，臺灣提著參賽資格，運動部煞以成績無達到標準，無欲派人去，予誠濟人攏想袂通，甚至有日本選手嘛貼文出來鬥贊聲。針對外界的質疑，中華民國衝湧運動協會也貼文表示，因為衝湧是新項目，所以提早辦培訓資格的選拔，不而過亞運的代表資格，攏有相關規定，佇咧放冗標準了後，兩位查埔選手猶是無達到亞錦賽的16名內，因此無法度代表參賽。

運動部常務次長洪志昌:「因為查某選手佇咧2改的資格賽，上好的選手是第7名佮第13名，抑若查埔選手的部分，上好的成績攏佇咧16名外，予會當入去到前8名的查某選手，嘛列入佇這改的亞運代表隊內底。」

原底猶抱著希望的家屬，落尾猶是一場空，家屬向望國家會當重新檢討制度，莫閣予選手的辛苦訓練攏誠做白了工。(新聞標題、導言及內文皆為台語文)