身障者欲坐公車煞佇塗跤爬 司機共抱上車

遠遠一位婦人人，為著欲坐公車，佇雨中爬。婦人的後生先共捒車仔、和塑膠椅仔提起去車頂。越過身欲去扶老母的時，看著司機跍落來共婦人人抱起去公車頂。

三重客運司機林榮新:「彼當時的想法就是不忍心啦，然後就過去共伊問，問完了後就共伊抱起來，然後送去阮車頂上安全的所在，予伊坐予好。」

這个有愛心公車司機，是駛三重客運857路線的司機，姓林、號做林榮新，伊講到職一年半，伊講彼工落雨天、佇蘆洲區鷺江國小站，拄著這位婦人人。伊也真謙虛，講伊只是做應該做的代誌，而且落車了後，這个婦人人和伊的後生，直直共伊頕頭謝多謝，心內就真歡喜矣。

三重客運司機林榮新:「我聽著感謝這句話，心內有影真歡喜啦!」

抑若這个婦人人的身分，新北市社會局掌握著、是60外歲人、社會局講過去捌提供電動代步車予伊，毋過這改是按怎無紮出門，會請社工去了解，提供必要的服務。

新北市社會局身障福利科長楊貴閔:「目前阮嘛掌握著這个身障婦女相關的基本資料、過去阮嘛捌提供過輔具佮長照資源予這个家庭，未來阮會請社工到厝，實際去了解規个家庭的需要。」

逐家攏咧討論司機真有愛心，但有身心障礙團體認為，現在的公車車底板，對司機來講真無方便，像這回司機就愛冒風雨，落車來用。

台灣身心障礙者自立生活聯盟祕書長林君潔:「司機雙手咧作業遮的物件，伊根本無手去攑雨傘，若穿雨幔嘛會無方便，所以我會感覺這馬的公車，並無考慮著真正操作者需要的模式，猶有就是天氣造成的利便性(不便)。」

民團建議政府會當參考國外，改用電動車底板，除了會當保障司機的工作權益，也會當省時間，減少危險。
記者鄭亞宣 林郁凱新北報導