壽山馬卡道屎蟹鋏薰頭 環境汙染損蕩生態
加入公視會員，
按讚收藏你關注的報導
發布時間：
更新時間：
高雄壽山有巡山隊志工，這幾年發現當地特有的馬卡道屎蟹大量死亡，最近佇南壽山的步道，閣翕著一隻馬卡道屎蟹，毋知對佗鋏薰頭欲轉去岫，志工表示，附近不時看著糞埽烏白擲，溝仔內底的馬卡道屎蟹死的比活的濟，怹誠煩惱當地的生態可能出現問題。（新聞標題、導言及內文皆為台語文）
一隻馬卡道屎蟹共薰頭鋏牢牢，沿路行沿路幌，看起來就親像是佇咧食薰仝款，有人感覺心適，毋過這个畫面予巡山隊志工是看甲誠心痛。志工講，南壽山環境教育步道，是這款特有的馬卡道屎蟹的大本營，以早來遮，規个溝仔底、路裡攏爬甲密密，毋過這站仔看著的是死的比活的濟，伊認為環境的改變已經對馬卡道屎蟹的生湠造成危機。
柴山巡山隊志工 郭高義：「為啥物毋放手有伊的理由；是毋是這爿的食食減少矣，伊就食糞埽矣？薰頭嘛算是糞埽的一種。」
國立中山大學學生 張雋曦：「可能咱佇咧環境的意識頂懸閣需要加強，毋過至少愛對家己的身軀邊開始做起⸺你製造啥物款一改性的糞埽，就盡量共紮走。」
南壽山環境教育步道是佇咧中山大學的校園內底，附近學生囡仔來來去去，嘛有誠濟人會來遮peh山，毋過人一濟，糞埽的問題就綴咧來。接受國家自然公園管理處委託研究馬卡道屎蟹的教授講，根據113年的調查，初步估計馬卡道屎蟹的數量大約是3萬7千隻，若是生湠地有環境汙染的問題，確實是一个危機。
中興大學生命科學系教授 施習德：「水質確實會影響著伊的存活率，因為伊就是愛較清氣的水質。若干焦薰頭猶無啥要緊，毋過若是糞埽，我想彼的影響會閣較大，因為你毋知影是啥物款的汙染物佇內底。」
教授強調，因為對馬卡道屎蟹的調查研究才拄開始，目前猶無一个科學性的數字來證明族群數量的變化，柴山巡山隊是呼籲政府愛設立告示牌，加強宣導生態保育的重要性。
記者 許嘉茹 邱紹揚 高雄報導
唐嘉良/編輯
