彰化埔心的羅厝耶穌聖名堂，是臺灣中部上早起造的天主教堂，今年是建堂150週年，這禮拜六會舉辦慶祝活動，除了彌撒祈禱，閣有真罕咧看的聖體遊行。（新聞標題、導言及內文皆為台語文）
「祢的愛予聖樂變成sí-soo-mì，逐家歡樂服務鄉民。」
教堂的合唱團把握時間練習，欲替十月初四的慶祝活動做準備；彰化埔心的羅厝耶穌聖名堂，今年創立150週年，教堂對年初就舉辦一系列的慶祝活動，這禮拜六閣會有真罕咧看的聖體遊行。
羅厝耶穌聖名堂牧靈福傳委員會執行長 邱福忠：「10/4這改是咱的系列活動，上尾一个活動，就是咱的閉幕式。對下早仔開始就有外口咱聽過的彌撒，彌撒了後有一个聖體遊行，包括唱主題曲的合唱團
閣咱禮儀人員，攏會佇今日做一擺的演練。」
1875年創立的彰化埔心的羅厝天主教堂，是中部歷史上久長的教堂，猶保存濟濟19世紀的文物，聖堂表示，這个所在毋但是地方的信仰中心，嘛和當地的發展有真峇的關係。
羅厝耶穌聖名堂資深導覽員 許仁弘：「一百五十年來（聖堂）佇地方做真濟代誌，（聖堂外口）這條羅厝路，是咱附近上早的柏油路；咱遮有上早的孤兒院；（早年）神父有買足濟家私，來幫助附近的村民，譬如講機器桶、抽水機等等，這攏是咱天主教會愛人的一種表現。」
今年是天主教25年一改的禧年，嘛是羅厝聖堂創立150週年，聖堂就講，有真濟臺灣各地、甚至嘛有立陶宛、日本、菲律賓的團體來遮朝聖，未來也按算整合教堂古文物、地方文化、特產佮附近的社區資源，欲共羅厝聖堂打造成一个兼顧信仰、歷史佮觀光外交的綜合朝聖地。
記者楊舒晴 彰化報導